تفادي المشاكل اللتي تواجه الشركات في تصميم المنتجات الرقمية

شركات كتير بتعمل منتج سواء كان website أو Mobile Application و بعض المسئول ومديري الشركات دي بيكون واصل له إنه عامل كل حاجة صح وده بحكم المجهود المبذول واللي في الغالب بيكون مجهود كبير فعلاً، وإن المنتج ده بيوفر قيمة كبيرة للمستخدمين بتوعه ولكن بيتفاجئ بعد مرحلة البداية ونزول المنتج للسوق أن عدد المستخدمين مش كبير أو اللي استخدم الابلكيشن مرة مرجعش استخدمه تاني.

نسأل السؤال المهم : المشكلة فين؟ 
من خبرتي البسيطة أقدر أقول إن معظم المشاكل تتلخص في النقاط دي :

١- القيمة المضافة أو Value Proposition
عملت المنتج بشكل مميز وتصميم احترافي والتعامل معاه سهل جدًا ومفيش أي مشكلة في الجانب التقني "Technical" وطبعًا دي حاجة مهمة و بتفرق، بس المستخدم مش مستفيد حاجة والمنتج مش بيحقق رغبة أو احتياج معين.

إيه القيمة اللي بيقدمها المنتج في الحالة دي ؟
مفيش قيمة حقيقية موجودة في المنتج ده!

2- سهولة الإستخدام أو Usability

النقطة دي عكس الجزء السابق بمعنى إن المنتج به قيمة مضافة بالفعل ومن الممكن أن تكون القيمة كبيرة للفئة المستهدفة من المستخدمين ولكنهم يعانون في التعامل مع المنتج  أو الوصول لهذه المميزات داخل المنتج - موقع أو تطبيق موبايل - ويحتاج الوصول لها مجهود كبير.

عشان تتفادي الخطوة دي لازم تعمل Usability Test عشان تتأكد من المشاكل اللي ممكن تواجه المستخدمين وتحلها.

هل دي كل المشاكل ؟ 

بالتأكيد لا فيه مشاكل كتير بتواجه أي منتج مثل :

الـ Branding  الـ Segmentation الـ Unique Value Proposition

ومشاكل تانية كتير ولكن انا ذكرت أشهر المشاكل في الجزء ده 

دورك كمصمم تجربة مستخدم انك تحل المشاكل دي وهي مسئوليتك في المقام الأول وده لا ينفي مسئولية الجزء الإداري أو البيزنس وتأثيره أيضًا على المنتج زي خدمة ما بعد البيع أو التسعير الخاص بالمنتج أو الجانب التقني 

هنا هوضح الخطوات اللي هتساعدك في تفادي الوقوع في المشاكل اللي اتكلمت عنها:

أول وأهم خطوة هي:

•  الإعتراف بدور وقيمة مرحلة تصميم تجربة المستخدم والإهتمام بها بشكل عملي سواء كانت مرحلة الـ UX Researchأو الـ Interaction Design
  
  علي الرغم من إنتشار معرفة الـ UX Design بشكل عملي في السنين الأخيرة إلا إن في بعض الشركات لسه مش مهتمة بمرحلة تصميم تجربة المستخدم أو بتنفذها بشكل خاطئ أو غير مكتمل، بمعنى إنه من الممكن الشركة تهتم بالتصميم من حيث الألوان والشكل ولكن مش بتهتم بالـ Usability بالنسبة للمستخدم وهو العنصر الأهم في نجاح أي منتج أو خدمة، أو تهتم الشركة بالتصميم والإستخدام ويكون التصميم غير مفيد أو لا يقدم قيمة حقيقية للمستخدم وفي المرحلة دي مفيش فايدة من المنتج وسيتم استخدامه لمرة واحدة أو مرتين على أقصى حد.
  
  

نظرًا لأهمية النقطة دي وأيضًا لمفهوم مركزية المستخدم في عملية التصميم User Centered Design لابد من تركيز الشركات علي تحقيق نتائج إيجابية تربط بين إحتياجات المستخدم أو User needs وأهداف الشركة Business Objectives.

وبما إن UX Strategy مهمة جدًا و تعتبر الرابط بين الـ Business و الـ Design هوضح أمثلة ممكن تستخدمها في تطبيق الخطوة دي:

• الـ Business strategy  وهنا لازم تعرف أهداف الـ Business وتتأكد من إنها قابلة للتحقيق أو لا.
• الـ Stockholders interviewing. 
• الـ Competitors Analysis.

ودي مش الطرق الوحيدة ولكن من أشهر الطرق اللي ممكن تساعدك في المرحلة دي.

وكده وصلنا للمرحلة التانية وهي:

•  الـ User Research والأسلوب الأكتر شهرة هيكون إنك تعمل الـ User Interviewing  و هي خطوة إجراء مقابلات مع فئة من المستخدمين المستهدفين والهدف منها معرفة تفاصيل عن المستخدم وتحقيق التعاطف مع المستخدم (الـ Empathizing) 

و هنا الهدف هو الحصول علي أكتر Insights أو معلومات مفيده من المستخدم، في الغالب المصمم يكون متوقع اللي هيقوله المستخدم، لكن بيتفاجئ بسناريوهات واحتياجات مختلفة وده هيوصلنا لـ insights جديده.

ويمكن نقل نتائج مرحلة البحث بأكتر من طريقة زي:

Personas
Empathy maps

لو وصلت للنقطة دي كده هتكون فهمت الـ Business, Market & Users وتكون جاهز انك تبدأ مرحلة تصميم المنتج وزي ما سهولة الاستخدام مهمة لازم يكون التصميم مميز وجميل.

و مع ذلك في احتمالية عدم نجاح المنتج من أول ظهول ليه في السوق، فمن الطبيعي ظهور المنتج والبدء في سماع اراء المستخدمين "Feedback" ثم تعديل المنتج حسب الطلب والمرحلة دي بنسميها الـ Iteration والمحاولة باستمرار في حل المشاكل حتى يكون المنتج جاهز للانطلاق والإنتشار